Александр Усик: "Биз Тайсон Фьюрини жанг ўтказишга мажбур қиламиз"

Саудияликлар британиялик чемпионга сўнгги молиявий таклиф тайёрлашяпти. Бу ҳақда украиналик боксчининг промоутери Александр Красюк хабар берди.

"Менга маълум бўлишича, ташкилотчилар Тайсонга сўнгги расмий таклиф тайёрлашяпти. Ҳаммаси Фьюрининг ўзида қолди. Биз ўз томонимиздан қўлимиздан келган бор ҳаракатни амалга оширдик. Агар у бу таклифни қабул қилса, катта жангга эга бўлади. Фаолиятидаги энг буюк жангни қўлга киритади. Мабодо рад жавобини берса, у ҳолда камарни бўшатиб қўйиб, нафақага чиқиши шарт бўлади", - деди Красюк.

Матбуот анжуманида иштирок этган Александр Усик ҳам бу масалага ўз муносабатини билдирди. 

"Супероғир вазн тоифасидаги ажойиб жангни мухлисларга улаша олиш имконияти менда борлигидан хурсандман. Бу мен учун катта шараф. Ҳа, Фьюри мен билан жанг қилишдан қочяпти. Лекин биз уни мажбур қиламиз. Биз бу ишни амалга оширамиз", - деди украиналик жаҳон чемпиони. 

Эслатиб ўтамиз, Александр Усик WBA, WBO, IBF ва IBO чемпионлик камарлари соҳиби бўлиб турибди. Тайсон Фьюри эса WBC чемпиони. Ўтган ойнинг сўнгги кунлари Бутунжаҳон бокс ассоциацияси (WBA) Усик камарини мажбурий даъвогар, британиялик Даниэл Дюбуадан ҳимоя қилиши кераклигини белгилаб берган эди.