Александр Усик: «Фьюри билан учрашиш Жошуадан кўра фойдалироқ бўлади»

Оғир вазн тоифасида WBО, IBF, WBА йўналишлари чемпиони Александр Усик (19-0, 13 КО) собиқ жаҳон чемпиони Энтони Жошуа (24-2, 22 КО) билан реванш жанги ташкил этилиши ҳақида фикр билдирди.

«Биз ҳали реванш жанги ўтказишга яқин эмасмиз, фақат промоутерлар, менежерлар ўртасида музокаралар олиб борилмоқда. Бу иш билан мен шуғулланмайман. Менинг вазифам машғулот ўтказиш, жанггача ўзимни яхши ҳис қилиш. Агар реванш жанги бўлиб ўтса, рингга чиқиб, ўз вазифамни бажараман. 

Мабодо, Жошуа четга чиқишга рози бўлса, мен Тайсон Фьюри билан учрашишга тайёрманми? Албатта! Мақсадларимдан бири - оғир вазн тоифасида жаҳоннинг мутлақ чемпиони бўлиш. Мен учун уларнинг қайси бири билан учрашишнинг мутлақо фарқи йўқ. Шунчаки, Тайсон Фьюри билан бу фойдалироқ бўлади, чунки унинг камари бор. Сиз Энтони Жошуа билан жанг қилмасдан тезроқ мутлақ чемпион бўлишингиз мумкин. Жошуа билан жанг ортга бир қадам ташлаш бўлади», - деди Усик ESPN'га берган интервьюсида.