Alfraganus University билан ҳамкорлик Меморандуми имзоланди ФОТОГАЛЕРЕЯ

Ўзбекистон Республикаси Президентининг Олимпия ва Паралимпия ўйинларига юртимиз спортчиларини комплекс тайёрлаш тўғрисидаги Қарорида спорт таълими тизимини тубдан такомиллаштириш ва рақамлаштириш, олимпия ва паралимпия дастурларига киритилган спорт турлари бўйича юқори натижадор ва олимпия спортчилар захирасини яратиш, спорт менежментини такомиллаштириш, спорт базалари ва иншоотларининг моддий-техник базасини мустаҳкамлаш, замонавий стандартларга жавоб берадиган янги спорт объектларини барпо этиш, улардан мақсадли ва самарали фойдаланиш каби бандлар бўлиб, Ўзбекистон дзюдо федерацияси бу йўналишларни амалиётга тадбиқ этиб келмоқда. 

Шу кунгача Федерация Тошкент Давлат иқтисодиёт университети, Ўзбекистон Давлат жисмоний тарбия ва спорт университети, Жисмоний тарбия ва спорт бўйича мутахассисларни қайта тайёрлаш ва малакасини ошириш институти билан ҳамкорлик Меморандумлари имзоланган эди. Куни кеча дзюдо спорт турини янада ривожлантириш йўлида федерация билан ҳамкорлик қиладиган олий ўқув юртлари сони яна биттага кўпайди. 

Эндиликда Алфраганус университети билан ҳамкорликдаги ишлар йўлга қўйилади. Ўзбекистон дзюдо федерациясида ўтган тадбирда Alfraganus University нодавлат олий таълим ташкилоти ректори Муҳаммадисмоил Маҳмудов, Университетнинг илмий ишлар ва инновациялар бўйича ректор маслаҳатчиси Фармонқул Эгамердиев, Ўзбекистон дзюдо федерацияси Бош котиби Азиз Собиров, федерация раиси маслаҳатчиси Ксения Гулямова ва бош масъуллар иштирок этди. 

Маълумот учун, Алфраганус университети 2022 йилда ташкил этилган бўлиб, унинг иқтисод, филология, педагогика, ижтимоий фанлар, рақамли технологиялар, тиббиёт, жисмоний тарбия ва спорт, туризм факультетлари ҳамда улар таркибида 37 та йўналиши мавжуд. Алфраганус университети ўзбек қомусий олими Аҳмад Ал-Фарғоний номига Алфраганус деб номланган. Ал-Фарғоний Европада айнан шу ном билан машҳур бўлган ва ойдаги кратерларнинг бири ҳам олим шарафига шундай аталган.

"Жисмоний тарбия ва спорт" факультети Вазирлар Маҳкамаси ҳузуридаги таълим сифатини назорат қилиш давлат инспекциясининг 2022 йил 12 августдаги № 034974-сонли лицензияси асосида ташкил этилган. Факультетнинг мақсади шахснинг интеллектуал, маданий ва ахлоқий ривожланишига бўлган эҳтиёжларини қондириш, олий маълумотга эга бўлиш, жамиятни жисмоний тарбия ва спорт соҳасида юқори малакали мутахассислар билан таъминлаш учун ижтимоий буюртмаларни бажаришдан иборат.

Университет раҳбарияти Федерацияга ташрифи чоғида бу ердаги мўъжазгина музей, терма жамоа аъзолари машғулот ўтказадиган дзюдо зали, меҳмонхона, ошхона, умуман дзюдочилар учун муҳайё қилинган барча шароитлар билан яқиндан танишишди. Томонлар ўқув-машғулот йиғинларини ташкил этиш, илмий-услубий ва инновацион технологиялар асосида дзюдо спорт турини янада такомиллаштириш бўйича ўзаро ҳамкорлик қилишга келишиб олишди.  

Меморандумга кўра, Федерация университетда дзюдо билан шуғулланувчилар учун машғулотларни ташкил этиш, малакали мураббийлар билан таъминлаш, машҳур дзюдочиларимиз иштирокида маҳорат сабоқларини ўтказиш, талабалар билан учрашувлар уюштириш каби қатор йўналишларга масъул бўлади. Ўз ўрнида Университет томонидан халқаро мусобақаларда натижа кўрсатган ҳамда Федерация томонидан тавсия этилган дзюдочиларимизнинг ушбу олий ўқув даргоҳидаги имтиёзли таҳсил олиши таъминланади.   

Ишонамизки, икки томонлама ҳамкорлик юртимиз дзюдоси ривожига хизмат қилади. Тадбир якунида томонлар ўзаро эсдалик совғаларини алмашишди.