27 апр 20:25
Янгиликлар

Бокс/ММА

АҚШда UFC 300 турнирининг яна бир жангчиси гонорари музлатиб қўйилди

14 апрель оқшомида ўтказилган UFC 300 турнири айрим жангчилар учун омадсиз оқшом сифатида эсда қолиши мумкин.

Гап шундаки, Невада штати Атлетик комиссияси ушбу турнирда жанг қилган иккинчи аралаш яккакураш устасининг ҳам ўша оқшом учун кафолатланган гонорарини блоклаб қўйди. Бунинг натижасида бразилиялик Диего Лопес UFC 300 турниридаги гонорарини оломаяпти.

Бу ҳақда MMA Junkie журналисти Нолан Кинг ўзининг ижтимоий тармоқдаги саҳифасида хабар бермоқда. Невада штати Атлетик комиссияси Лопеснинг Содик Юсуффни мағлуб этганидан кейин октагон сеткасидан ошиб ўтгани учун шундай йўл тутган.

Аввалроқ, Атлетик комиссия UFC 300 турнирида жанг ўтказган Арман Царукяннинг ҳам гонорарини музлатиб қўйганди. Бундай қарор қабул қилинишига Арманнинг октагонга чиқиб келиш пайтида трибунадаги мухлис билан уришиб кетгани сабаб бўлганди.