Арман Царукян Москвада навбатдаги жангини ўтказди

Москва шаҳрида ташкил этилган Бразилия жиу-житсуси бўйича ACBJJ 18 турнирида Арман собиқ WEC ва UFC чемпиони Бенсон Хендерсонга қарши баҳс олиб борди. Биринчи дақиқанинг ўзидаёқ у америкалик рақибини партер ҳолатига туширди ва оз эмас, кўп эмас, 7 дақиқа давомида жангни муддатидан аввал якунлашга ҳаракат қилди. Царукян бу вақт оралиғида 20 дан ортиқ усулни бажарди. Хендерсон яхши ҳимояланди ва саккизинчи дақиқада ўрнидан туришга ҳам муваффақ бўлди. Лекин беллашув якунланишига 62 сония қолган бир пайтда Арман қўлда учбурчак бўғиш усули билан Бенсонни таслим этди. 

Шу тариқа, Арман Царукян шу йилнинг ўзида гиламдаги учинчи ғалабасини қўлга киритди. Бунгача у грепплингда ҳамюрти Маккашарип Зайнуковни очколар, бразилиялик Патрики Фрейрени муддатидан аввал мағлубиятга учратган эди. 

Жанг якунланиши билан россияликнинг ACBJJ лигасидаги навбатдаги рақиби эълон қилинди. Арман яна бир россиялик аралаш яккукураш устаси Майрбек Тайсумовга қарши гиламга чиқади. Царукяннинг UFC октагонига қайтиши 22 ноябрь куни Қатарда ўтказиладиган UFC турнирига тўғри келмоқда. Арман оқшомнинг асосий жангида Янги Зеландия вакили Дэн Хукерга қарши октагонга чиқади.