Australian Open–2023 мухлислар ташрифи бўйича барча "Катта Дубулға" турнирлари рекордини ўрнатди

Икки ҳафта давомида Австралиянинг Мельбурн шаҳри мезбонлик қилган мусобақага 839 192 мухлис ташриф буюрган (саралаш баҳслари ҳисобга олинса бу кўрсаткич 902 312 кишига ошади). Олдинги рекорд 812 174 киши билан 2020 йилда Австралияда ўрнатилган (пандемиядан олдинги охирги турнир).

Бундан ташқари, 21 январь куни Австралия очиқ чемпионатига жами 94 854 томошабин ташриф буюрди, бу аввалги рекорд (93 709 )дан 1 145 тага кўп.

"Кўпчилик (Рожер Федерер, Серена Уильямс ва Эшли Барти кетганидан кейин) бизда энди буюклар йўқлигини, ҳаммаси даҳшатли бўлишини айтишди. Лекин одамлар шунчаки дам олишни хоҳлашади, теннис эса ажойиб имконият. Бу мелбурнликлар ва австралияликлар, шунингдек, бутун дунёдан келган меҳмонларимиз учун ёзги ўйин-кулгига айланди”, - деди Tennis Australia бош директори Крэйг Тили The Age нашрига берган интервьюсида.

Тилининг фикрича, келаси йили турнир биринчи марта миллион томошабин чегарасидан ўтиши мумкин:

"Бу йилги кўрсаткич фақат бошланиши. Келаси йил уч ҳафталик феерия бўлади."

Эслатиб ўтамиз, "Уимблдон-2022"нинг асосий тўр ўйинларига 515 164 киши, "Ролан Гаррос-2022"га 613 500 нафар, US Open-2022га 776 120 киши ташриф буюрган.