Азамат Абдураимов истеъфога чиқди

2018 йил март ойида ушбу терма жамоага бош мураббий этиб тайинланган Азамат Биродарович ўз аризасига кўра ишдан бўшади. Буни мураббийнинг ўзи ҳам тасдиқлади. 

Эслатиб ўтамиз, Абдураимов бошчилигидаги Ўзбекистон ўсмирлар терма жамоаси Осиё чемпионати финал босқичига йўлланмани қўлга киритган эди. Яқиндагина терма жамоа Беларусь пойтахтида ўтган Ривожланиш кубогида иштрок этиб 8та жамоа орасида 8-ўринни эгаллаган эди. 

Ушбу қарор сабабини билиш учун мураббий билан боғландик.

"Ҳа, бу ҳақиқат. Бугун кетиш ҳақида ариза ёздим. Қарор ўзимники. Уни муҳокама қилишни истамайман. Бу терма жамоа билан 2 йил ҳалол меҳнат қилдим, Осиё чемпионати финалига чиқдик. Ўтган йили жамоани тозаладик ва ҳозир унда бирорта ёши катта ёки таниш билиш орқали келган футболчи йўқ. Футболни таниш-билишчилик билан ўйнашмайди, афсонавий футболчининг ўғли сифатида буни яхши биламан. Ҳаммасига ўзим эришганман. Отамнинг фамилияси туфайли икки баравар қийин бўлган.

Бу терма жамоага кўп куч ва меҳнатимни сарфладим. Иродали жамоа туза олдим. Ёш ўйинчиларга ажойиб футболчи бўлиб етишишни, янги мураббийлар штабига эса жаҳон чемпионатига чиқиш вазифасини бажаришни тилайман" - деди Азамат Абдураимов.