25 авг 17:01
Янгиликлар

Дзюдо

Азизжон Камилов Осиё чемпионатига жўнаб кетиш арафасида турган мураббий ва дзюдочиларимиз билан учрашди

Хабар берганимиздек, 29 август - 1 сентябрь кунлари Корея Республикасининг Мунгёнг шаҳрида дзюдо бўйича ўсмирлар ва ёшлар ўртасида Осиё чемпионати бўлиб ўтади.

Бир неча кундир-ки, ҳар икки терма жамоамиз бўлажак қитъа биринчилигига тайёргарлик кўрмоқда. Ўсмирларимизнинг машғулоти Тошкентда ташкил этилаётган бўлса, ёшларимиз Бухоро шаҳрида ўқув-машғулот йиғини ўтказиб қайтишди. Ҳар иккала терма жамоамиз ҳам тўлиқ таркибда Осиё чемпионатида қатнашади.

Ўзбекистон Миллий олимпия қўмитаси раиси ўринбосари, мамлакат дзюдо федерацияси раиси Азизжон Камилов сафар олдидан турган дзюдочиларимиз ва улар билан учрашди. Суҳбат чоғида Азизжон Якубжанович мураббийларнинг тайёргарлик ҳақидаги фикрларини тинглади ва ўз тавсияларини берди.

Маълумот учун, Осиё чемпионатида қитъамизнинг 17 давлатидан 400 нафарга яқин дзюдочи медаллар йўлида татамига чиқади.