Баҳодир Жалолов: «Биз фақат Аллоҳдан қўрқамиз, бандасининг «любой»и билан рингга чиқишга тайёрмиз»

Олимпиада чемпиони Баҳодир Жалолов сўнгги жангидаги нокаут, келаси йилдаги режалар ва албатта бугунги проф бокс оқшоми ҳақида гапирди.

“Сўнгги жангимда тезкор ғалаба қозондим. Бунинг учун Аллоҳга ҳамд айтаман. Қанийди, ҳамма жангни биринчи раундда якунлаб рингдан чарчамаган ҳолда чиқсак. Бу ҳам бир мушкул. Бу мушкулни Аллоҳ енгил қилди. Лекин бунга қарамай, ўз устимда яна ҳам кўпроқ ишлашга ҳаракат қиламан. Чунки ҳали олдинда 12 рандлик учрашувлар турибди. Жошуа, Усик билан ҳозир бўлса ҳам жанг қилишга тайёрман. Ҳеч ким онасини қорнидан чемпион бўлиб туғилмаган. Уларнинг ҳам иккита қўли, иккита оёғи бор. Ин Шаа Аллоҳ, биз ҳам меҳнат қиламиз ва ўша даражага етамиз. Биз фақат Аллоҳдан қўрқамиз, бандасини «любой»и билан рингга чиқишга тайёрмиз. Келаси йилда 3-4 та профессионал жанг ўтказиш ниятидаман. Ҳозир менежерим билан гаплашдик. Менга кучли рақиблар бериши кераклигини, шунга яраша тайёргарлик кўришимни, чемпионлик жангига тезроқ чиқишим кераклигини айтдим.

Ўзбекистондаги бокс оқшомида рингга чиқадиган ҳамма боксчиларимизга омад тилайман. Ҳаммалари ғалаба қозонишади деб ўйлайман. Мадримовни олдида катта йўл турибди. Шу йўлдан ўтиб олса чемпионликка бир қадам қолади”, - деди "Big Uzbek" Жалолов.