Баҳодир Жалолов: «Қилаётган меҳнатимизни ўзимиз биламиз, уни доим ҳам кўз-кўз қилишимиз шарт эмас»

Баҳодир Жалолов Олимпиададан сўнг машғулотларни камайтирдими? Кейинги жанг қачон ва ким билан? Шу каби саволларга боксчимизнинг ўзи жавоб берди.

“Ҳа, тадбирларга кўп чақиришади, лекин биз машғулотларни ҳам ўз вақтида қиляпмиз. Машғулотлар видеосини ҳар куни тармоқларга жойлай олмаймиз. Барибир рақибларимиз бор, бизни кузатиб боришади, керакли жойларини қўямиз. Қилаётган меҳнатимизни фақат ўзимиз биламиз, уни бошқаларга доим ҳам кўрсатиб, кўз-кўз қилишимиз шарт эмас. Чунки рингда жанг қиладиган ҳам, қийналадиган ҳам ўзимиз ҳисобланамиз. Енгилсак, жабр кўрадиган ҳам ўзимиз, ғолиб бўлганда ҳузур қиладиган ҳам ўзимиз. 

Йил якунигача проф боксда битта жанг ўтказиш ниятим бор. Ҳозирда шунинг ҳаракатидамиз. Машғулотларни тўхтатганим йўқ. Бугундан Ўзбекистон бокс федерациясида жиддий тайёргарликларни бошлаймиз. Рақиб ҳали аниқ бўлмади. Мағлубиятга учрамаган боксчини рақиб сифатида беришларини сўраяпман. Жанг Тошкент ёки Дубайда бўлади. Рақиб аниқ бўлса, ўзим Инстаграм орқали хабар бераман. Январь ойида АҚШга йўл оламиз", - деди Баҳодир Жалолов Olamsport.com сайти мухбири билан суҳбатда.