Баҳодир Жалолов ва Исроил Мадримов талабаларни қутлади

Мазкур мусобақаларда Ўзбекистон давлат жисмоний тарбия ва спорт университети ҳамда Ўзбек + Беларус қўшма жисмоний тарбия, спорт ва туризм факультетининг магистрлари мини-футбол, волейбол, стол тенниси, армрестлинг, энгил атлетика ва арқон тортиш бўйича ўзаро беллашди.

Тадбирда халқаро тоифадаги спорт усталари, бокс бўйича жаҳон чемпионлари Баҳодир Жалолов ҳамда Исроил Мадримов иштирок этди.

Сўнгги пайтларда ўтказилаётган нуфузли халқаро мусобақаларда ватанимиз шаънини муносиб ҳимоя қилиб келаётган юртимиз фахри бўлган бу спортчилар айни пайтда университетнинг 1-босқич магистратура талабалари ҳисобланади.

Тадбирда Баҳодир Жалолов ҳамда Исроил Мадримов сўзга чиқиб, мусобақа муҳтарам Президентимизнинг ёшлар маънавиятини юксалтириш ва уларнинг бўш вақтини мазмунли ташкил этиш бўйича 5 та муҳим ташаббуси ижросини таъминлаш ва ёшларни жисмоний чиниқтириш, уларнинг спорт соҳасида қобилиятини намоён қилишлари учун зарур шароитлар яратиш ҳамда жисмоний тарбия ва спортни тарғиб этиш ва оммалаштириш мақсадида ташкил этилганини таъкидлаб, Ўзбекистон Республикаси Конституцияси қабул қилинганлигининг 27 йиллиги муносабати билан университет профессор-ўқитувчиларини, талабаларни табриклади.

Мусобақада умумжамоа ҳисобида биринчи ўринни университетнинг 1-курс магистрлар жамоаси, иккинчи ўринни университетнинг 2-курс магистрлар жамоаси, учинчи ўрини Ўзбек + Беларус қўшма жисмоний тарбия, спорт ва туризм факультетининг магистрлар жамоаси эгаллашди.

Мусобақа якунида иштирокчиларга ташкилотчилар томонидан медаль ва эсдалик совғалари топширилди.