Баҳодир Жалоловнинг вазнидаги панчерлар ўзаро жанг ўтказади

Гап Жаред Андерсон (15-0, 14 КО) ҳамда Жан Кособуцкий (19-0, 18 КО) ҳақида кетмоқда. Нокаутчилар ўртасидаги жангнинг 29 август куни АҚШнинг Оклахома штати Талса шаҳрида ўтказилиши айтилмоқда. Бу ҳақда ESPN журналисти Кристина Пончер таниқли промоутер Боб Арумга таянган ҳолда хабар берди. 

"Мен Бобдан эфирдан ташқари суҳбатимда Жареднинг кейинги жанги ҳақида сўрадим. У шундай жавоб берди: "Биринчи галда биз Андерсоннинг фаол бўлиб қолишини истаймиз. Режамизга кўра 29 август куни Талсада унга жанг ташкил қилиб берамиз. Рақиб аввал режа қилинганидек, Жан Кособуцкий бўлади. Унинг рекорди 19-0, 18 нокаут!". Пончернинг айтишича, қозоғистонлик боксчининг АҚШ визаси билан боғлиқ масаласи ижобий ҳал бўлган. 

Эслатиб ўтамиз, Жаред Андерсон кеча тонг саҳарда Чарльз Мартинни ҳакамларнинг якдил қарори билан мағлубиятга учратганди. Аслида Жаред кеча Кособуцкий билан жанг ўтказиши керак эди. Аммо Жан АҚШ визасини ўз вақтида ололмагани учун ушбу жанг бекор бўлганди.