Баҳодирлар ўйини ва тош кўтариш бўйича халқаро турнирда полвонларимиз биринчи бўлишди + ФОТО

Ўзбекистон Жисмоний тарбия ва спорт вазирлиги ва Ўзбекистон Баҳодирлар ўйини ва тош кўтариш федерацияси томонидан ташкил этилган Халқаро очиқ турнирда юртимиз спортчиларидан ташқари Туркия, Россия, қўшни Қозоғистон, Қирғизистон ва Тожикистон давлатларидан келган апл полвонлар медаллар учун кураш олиб борди.

Халқаро Очиқ кубок якунига кўра ҳамюртимиз Ҳамза Примов энг яхши натижа билан биринчи ўринни эгаллади. Терма жамоамизнинг яна бир аъзоси Шуҳрат Алиханов кумуш, қозоғистонлик Алексей Писаревский бронза медалига сазовор бўлди. Умумжамоа ҳисобида Ўзбекистон терма жамоаси биринчи, Қозоғистон иккинчи, Россия эса учинчи ўринни банд этди. Туркиялик полвонларга тўртинчи ўрин насиб этди.    

Ёшлар ўртасидаги баҳсларда шохсупанинг уччала поғонаси ҳам ўзбекистонлик полвонлар томонидан банд этилди. Нуриддин Эргашев биринчи, Шодилбек Эргашев иккинчи, қорақалпоғистонлик Оғабек Миршарипов учинчи ўринни эгаллади.

Баҳодирлар ўйини бўйича Ўзбекистон кубогида эса Дилмурод Қурбоновга тенг келувчи рақиб топилмади. Таниқли оғир атлетикачимиз Рустам Жангабаев иккинчи, Баҳодир Йўлчиев эса кучли учликка якун ясаб берди.