Баҳодирлар ўйинлари ва тош кўтариш бўйича мамлакат чемпионлари аниқланди

Хабарингиз бор, Жисмоний тарбия ва спорт вазирлиги ҳамда Баҳодирлар ўйинлари ва тош кўтариш федерацияси ҳамкорлигида бир неча кун аввал Сирдарё вилоятида Баҳодирлар ўйинлари ва тош кўтариш бўйича мамлакат чемпионатига старт берилган эди.

Бахт шаҳри мезбонлигида ўтказилган Ўзбекистон чемпионати баҳсларида республикамизнинг барча ҳудудларидан сараланган 400 нафардан зиёд полвонлар куч синашишди. Ушбу мусобақада ўсмирлар, ёшлар, катталар, фахрийлар ва имконияти чекланган спортчилар ғолиблик учун беллашишди.

Қизғин ва муросасиз кечган чемпионат якунига кўра умумжамоа ҳисобида тош кўтариш баҳсларида 1-ўринни Сирдарё вилояти жамоаси эгаллади, 2-ўрин Андижон вилояти жамоасига насиб этган бўлса, кучли учликни Хоразм вилояти жамоаси якунлаб берди.

Баҳодирлар ўйинлари баҳсларида 1-ўринни Сурхондарё вилояти, 2-ўринни Андижон вилояти жамоаси эгаллаган бўлса, 3-ўрин Фарғона вилояти полвонларига насиб этди.

Ушбу чемпионатни ўтказишдан кўзланган асосий мақсад жорий йилнинг апрель ойида пойтахтимизда ўтказилиши режалаштирилган Осиё чемпионатига тайёргарлик кўриш ва илғор спортчиларни саралаб олишдан иборат. Мусобақа спортчилар ўзларини имкониятларини яна бир бор синовдан ўтказишлари учун катта имконият бўлди.