Бекзод Хидиров якунига етган Ўзбекистон кубоги, янги ном ва режалар ҳақида гапирди

Ўсмирлар терма жамоаси катта мураббийи Бекзод Хидиров Ўзбекистон кубогидаги жанглар ва келгуси режалар ҳақида гапирди.

«Кўрдикки, мусобақа иштирокчилари яхши спорт формасида экан. Бу боксчилар октябрь ойида "Универсал" спорт саройи мезбонлигида ўтган ўсмирлар ўртасидаги Ўзбекистон чемпионатида ҳам иштирок этишган эди. Кубок баҳслари орқали эса ўз маҳоратларини яна бир бор ошириб олишди.  Ишонаманки, мана шу турнирлар орқали биз саралаб олган ёш чарм қўлқоп усталари келажакда Олимпиада, Жаҳон чемпионлари бўлиб етишади. Кубок баҳсларида -42 кг вазнда иштирок этган Нодир Эргашевни ўзим учун кашф қилдим деб айта оламан. Жуда ҳам иқтидорли спортчи экан. -63 кг вазнда намангалик боксчи ҳам менда яхши таассурот қолдирди. 

Декабрь ойи ўрталарида Шаржа шаҳрида халқаро ўқув-йиғин машғулотини ўтказишни режалаштирганмиз. Бу каби халқаро ўқув-йиғин машғулоти кейинги йил бўлиб ўтадиган Осиё чемпионати ва халқаро турнирларга тайёргарликда ёш боксчилар учун руҳий томонлама муҳим аҳамият касб этади. Ундан кейинги ўқув-йиғин машғулотларимиз январь ойида Тошкент вилоятидаги "Янгиобод" базасида бўлиб ўтади» - деди Бекзод Хидиров.

Хуршида Абдикулова, Сарвиноз Рахмонқулова суҳбатлашди