Белбоғли кураш федерацияси йил якунларини сарҳисоб қилди + ФОТО

Унда Жаҳон Белбоғли Кураш Ассоциацияси (ЖБКА), Осиё белбоғли кураш конфедрацияси, "Адолат" СДП сиёсий кенгаши раҳбарияти, партиянинг Тошкент вилояти кенгаши фаоллари, Ўзбекистон белбоғли кураш федерацияси вакиллари, спортчилар, мураббий ва мутахассислар ҳамда ОАВ вакиллари иштирок этишди.

Тадбирни Ўзбекистон белбоғли кураш федерацияси раиси Равшан Дастиров кириш сўзи билан бошлаб, ортда қолган 2021 йил белбоғли кураш спорти учун юксак натижалар ва муваффақиятларга бой йил бўлганлигини эътироф этди. 

Спортчиларимиз республика ва жаҳон миқёсида ўтказилган мусобақаларда шохсупанинг юқори поғоналаридан ўрин эгаллаб, мамлакатимиз спорт захирасига медаллар шодасини тақдим этишгани, юртимиз шаънини муносиб ҳимоя қилганликларини мамнуният билан қайд этди. 

Шунингдек, маросимда иштирок этган жаҳон белбоғли кураш ассоциацияси президенти Ғаниев Азизбек Абдухалилович ҳам йиғилганларни қутлаб, ассоциация томонидан амалга оширилаётган ишлар хусусида таъкидлаб ўтди. 

Тадбирда сўз олган Осиё белбоғли кураш конфедрацияси президенти Муратов Мўмин Манапович эса Осиёда белбоғли курашни ривожлантириш масалалари ҳақида тўхталиб, жорий йилги халқаро мусобақаларда полвонларимизга муваффақият тилади.

Йиғилишда шунингдек, Ўзбекистон "Адолат" СДП сиёсий кенгаши раиси ўринбосари Абдукамол Раҳмонов , "Адолат" СДП Тошкент вилояти Кенгаши раиси Бобур Мамировлар ўз табрик сўзларини билдиришди. 

Шундан сўнг Ўзбекистон белбоғли кураш федерацияси ҳамда "Адолат " СДП сиёсий кенгаши томонидан турли йўналишлар бўйича номинацияси ғолиблари диплом ва қимматбаҳо совғалари билан мукофотланишди.

Илҳом РАҲМОНОВ тайёрлади