Белбоғли курашни янада ривожлантириш йўлида меморандум имзоланди

Миллий спорт туримиз бўлган белбоғли кураш нуфузини янада кўтариш, 2025 йилда Тошкент шаҳрида ўтказиладиган ёшлар Осиё ўйинларида белбоғли кураш бўйича терма жамоани муносиб иштирок этишини таъминлаш, қолаверса, жаҳон ареналарида ёш спортчиларимизнинг юқори натижаларга эришиши ва ўзаро ҳамкорлик алоқаларини ривожлантириш мақсадида Ўзбекистон белбоғли кураш федерацияси Республика олимпия ва паралимпия спорт турларига тайёрлаш маркази билан Меморандум имзоланди. 

Икки томонлама ўзаро манфаатли ҳамкорлик меморандумини Республика олимпия ва паралимпия спорт турларига тайёрлаш маркази директори Аброр Мамадалиев ҳамда  Ўзбекистон белбоғли кураш федерацияси раиси Равшан Дастиров имзолашди.

Мазкур ҳамкорлик меморандум учрашувида Ўзбекистон белбоғли кураш федерацияси бош котиби Абдухалил Маликов, РОПСТТМ белбоғли кураш бўйича бош мураббийи Усмон Маҳаматов, Ўзбекистон белбоғли кураш федерацияси ҳакамлар ҳайъати раиси Тошкентбой Яхшибоевлар ҳам иштирок этишди. 

Учрашув доирасида марказ директори Аброр Мамадалиев федерация вакилларини  марказда ташкил этилган музей экспонатлар билан таништирди. Шунингдек, федерация раҳбарияти марказда бунёд этилган ва барча шарт-шароитлар муҳайё этилган айрим спорт залларини ҳам кўздан кечиришди.

Илҳом РАҲМОНОВ тайёрлади