Bellator 254: Чемпионнинг илк мағлубияти, "Чангалзор қироли"да ғалаба + ФОТО

Мухлислар Bellator 254 турнирига гувоҳ бўлишди. Турнирнинг марказий жанги аёллар ўртасида енгил вазн тоифаси чемпионлиги учун бўлиб ўтди. Унда Илима-Лей Макфарлэйн ҳамда Жулиана Веласкес ўзаро октагонда тўқнаш келишди.

Кутилмаганда амалдаги Bellator чемпиони Илима-Лей Макфарлэйн мағлубиятга учраб, камаридан маҳрум бўлди. Бу унинг фаолиятидаги илк мағлубият эди. Жулиана Веласкес эса ғалабали одимини давом эттирди. У барча жангларида зафар қучган. Беш раунд якунларига кўра ҳакамлар бир овоздан 49-47, 48-47, 48-47 ҳисобларида Веласкеснинг ғалабасини таъминлашди.

Оқшомнинг андеркард жангида собиқ ACB чемпиони Магомед Магомедов промоушендаги дебютини ғалаба билан нишонлади. Доғистонлик спортчи бразилиялик рақиби Матеус Маттосдан 30-26, 30-27, 30-27 ҳисобларида устун келди. Бу ғалабасидан сўнг у ўзини "Bellator чангалзорининг янги қироли" деб эълон қилди.

Бошқа натижаларга тўхталадиган бўлсак, британиялик Линтон Васселл иккинчи раундда Ронни Маркесни техник нокаутга учратди. Шамиль Никаев эса муросасиз кечган баҳсда Кемран Лачиновни 29-28, 29-28, 29-28 ҳисобларида енгди.