Беш нафар дзюдочимиз Жаҳон чемпионлиги учун татамига чиқади, финалда ўзбек дербисига гувоҳ бўламиз!

Ўз тарихида 42-маротаба ташкил этилаётган дунё биринчилигининг иккинчи кунги саралаш баҳслари якунланиб, кечки финал дастурида медаллар учун татамига чиқадиган дзюдочилар маълум бўлди. 

Қувонарлиси, беш нафар дзюдочимиз жаҳон чемпионатининг олтин медали учун курашади. -81 кг вазн тоифаси финалида эса ўзбек дербисига гувоҳ бўламиз. Ҳикматуллоҳ Тўраев ва Мусо Собиров ўзаро беллашувда олтин медаль тақдирини ҳал қилишади. 

Шунингдек, Ирисхон Қурбонбоева (+78 кг), Рустам Шораҳматов (-100 кг) ва Шоҳруҳ Бахтиёров (+100 кг) ҳам Ҳарбийлар ўртасидаги жаҳон чемпионати финал учрашувида татамига чиқади. 

Бундан ташқари, яна уч нафар дзюдочимиз - Ширинжон Йўлдошева (-70 кг), Муштарийбегим Афзалова (-78 кг) ва Бекмурод Олтибоев (+100 кг) бронза медали учун баҳс олиб боради.

Шу тариқа, бугун курашга киришган 8 нафар дзюдочимизнинг бари кечки финал дастурида медаллар учун татамига чиқадиган бўлди.