Биринчи ракеткамиз Манама "Челленжер" турнирининг 1/4 финалида

Мукофот жамғармаси 60 минг долларни ташкил қилувчи мусобақада ҳамюртимиз Сергей Фомин ҳам муваффақиятли одимламоқда. Мамлакатимизнинг биринчи рақамли теннисчига айланиб олган Фомин 1/16 финал босқичида америкалик Дали Бланчни уч сет натижасига кўра қийинчилик билан мағлубиятга учратганди - 6/7(2), 7/6(1), 6/3. 

Бугун Сергей 1/8 финалда германиялик Максимилян Хомберг билан ҳисоб-китоб қилди. Саксон саккиз дақиқа давом этган баҳсда Фомин 6/0, 7/6(4) ҳисобида ғалаба қозониб, чорак финалга йўл олди. Фомин 5, Хомберг 1 та эйс зарбани амалга оширган. Қўшхатолар олмон теннисчисида бир неча баробар кўп бўлди - 11 га 2. Бу теннисчиларнинг ўзаро ўтказган иккинчи учрашуви эди. Икки ҳафта аввал айнан шу кортларда ўтган илк тўқнашувда ҳам Фоминнинг қўли баланд келганди.  

Таққослаш учун, Сергей Фомин айни пайтда ATP рейтингида 358, Бланч 451, Хомберг эса 868-ўринни эгаллаб турибди. Эртага теннисчимиз 1/4 финалда британиялик Тоби Самуэлга қарши кортга чиқади. 23 ёшли Тоби дунёнинг 329-ракеткаси бўлиб турибди. Самуэль - Фомин учрашуви эртага бизнинг вақт билан соат 18:00да бошланади.