Брисбен (WTA 500). Соболенко чемпионлик титулини ҳимоя қилди

Дунёнинг биринчи ракеткаси ҳал қилувчи финал учрашувида WTA рейтингида 26-ўринни эгаллаб турган украиналик Марта Костюкни мағлубиятга учратди - 6/4, 6/3. Бу билан у ўтган йилги чемпионлигини мувафақиятли тарзда ҳимоя қилди. Теннисчиларнинг ўзаро бешинчи учрашувида ҳам Арина Мартадан устун келди. 

Етмиш тўққиз дақиқа давом этган финал баҳсида Соболенко 1, Костюк 3 та эйс зарбасини амалга оширди. Қўшхатолар 3 га 0 кўринишида Костюк, брейклар эса 3 га 1 тафовути билан Соболенко фойдасига ҳал бўлди. 

Шу тариқа, Арина Соболенко фаолиятидаги 22-совринига эга чиқди. Brisbane International турниридаги муваффақиятли иштирок унга 500 рейтинг очкоси ҳамда 214 530 АҚШ доллари миқдорида мукофот пули келтирди. Вице-чемпион Марта Костюк эса бир ҳафталик меҳнатидан 325 очко ва 134 600 $ ишлаб олди.