"Бу менга ваъда қилинган жанг эди". Бектемир Мелиқўзиев чемпионлик жангини сўрамоқда

"WBA нима учун ўз қоидаларига амал қилмаётганини тушунмайман. Расман тасдиқланган мажбурий даъвогар бор ва чемпион унга қарши ўз унвонини ҳимоя қилиши шарт.

Мендан Мунгуиага мендан олдин чемпионлик учун жанг қилишга рухсат беришимни сўрашганди, аммо кейинги навбат албатта меники бўлиши айтилган эди. Канело Альварес қоидаларга амал қилмаса ҳам бўлишини тушунаман, аммо энди Канело билан бир жамоадаги боксчилар ҳам шундай имтиёзларга эга бўладими?

Бу ҳолат қайта-қайта такрорланмоқда. Улар ўз қоидаларини ўзлари бузмоқда. Биз эса доим қоидаларга амал қиламиз. Ана шу қоидалар асосида рейтингларда юқорига кўтариламиз. Аммо ниҳоят меҳнатимиз самараси бўлган имкониятга етиб келганимизда, ўша қоидаларга ҳурмат кўрсатилмайди.

Мен мажбурий даъвогар мақомини рингда қўлга киритдим. Бу жанг менга ваъда қилинган эди. WBA ҳам, Golden Boy ҳам менга шу имкониятни кафолатлаган.

Ҳозир мантиқан энг тўғри жанг — бу мен ва Мунгиа ўртасидаги жанг. Бу рақобатбардош баҳс бўлади ва кўплаб мутахассислар ҳатто Мунгиани фаворит деб ҳисоблашмоқда. У мен билан жанг қилиши шарт. Мендан олдин ҳеч ким бўлмаслиги керак.

Услуб жиҳатидан ҳам бу жанг ҳақиқий уруш бўлишига ишонаман. Мунгиа жанг қилишни яхши кўради, мен ҳам шундайман. Бу ажойиб жанг бўлади. Бу кафолатланган уруш ва 31 октябрь куни Саудия Арабистонида ўтиши режалаштирилган Канело — Кристиан Мбилли кечасининг энг яхши co-main event жанги бўларди. Бир кечанинг ўзида икки шиддатли ва икки ажойиб жанг бўлар эди.

Албатта, мен Мунгиани мағлуб этиш учун етарли имконият ва маҳоратга эгаман деб ҳисоблайман. У ажойиб боксчи. Ҳар доим олдинга интилади ва рингга чиққан ҳар сафар ҳақиқий жанг кўрсатади. Аммо мен ҳам айнан шундайман.

Менимча, улар менинг мавжудлигимни шунчаки эътиборсиз қолдиришмоқда. Мажбурий чемпионлик жангимни кутаётганим учун бошқа жангда ўз мақомимни хавф остига қўймаслигим керак. Аммо қайси мақом ҳақида гап кетяпти?

Бошқа барча боксчиларни ҳурмат қиламан, аммо ҳозир навбат меники. Бу менинг имкониятим. Мен бу имкониятни ҳалол меҳнатим билан қўлга киритганман", - деди Мелиқўзиев RingMagazine журналига берган интервьюсида.