Будапештдаги бокс оқшомида яна бир ҳамюртимиз жанг қилади

Мусобақа доирасида яна бир ҳамюртимиз рингга кўтарилиши аниқ бўлди.

Иккинчи энг енгил вазн тоифасида фаолият олиб бораётган чарм-қўлқоп устаси Муҳаммад Шехов мазкур турнирда Венесуэла вакили Орландо Моралес билан баҳс олиб боради.

Беллашув 8 раунд этиб белгиланган.

32 яшар Муҳаммад Шехов фаолияти давомида ҳозирга қадар 16 та жанг ўтказиб, 15 та ғалаба ва 1 та дуранг қайд этган. У оҳирги жангини ўтган йилнинг декабрь ойида хитойлик Зонг Лиуга қарши ўтказиб, очколар ҳисобига кўра ғалаба қозонган ва вакант бўлиб турган IBF Intercontinental камарини қўлга киритганди. Ҳамюртимиз ҳозирда WBO рейтингида 5-ўринни эгаллаб турибди.

Унинг бўлажак рақиби, 20 ёшли Орландо Моралес ҳисобида эса 13 та ғалаба ва 2 та мағлубият мавжуд.

Аввалроқ, мазкур мусобақада Шоҳжаҳон Абдуллаев ва Комронбек Турғунбоев ҳам рингга кўтарилиши ҳақида хабар берган эдик.