Бугун Ҳасанбой Раҳимов ва Магомед Ибрагимов Олимпиада лицензияси учун сўнгги уринишни амалга оширишади

Бугун мусобақанинг охирги куни Париж-2024 Олимпиадасининг учун сўнгги лицензиялар ўйналади. Кечаги баҳсларда 1/4 финалда рақибларига имкониятни бой бериб қўйган Рио-2016 Олимпиадасининг бронза медали совриндори Магомед Ибрагимов (-97 кг) ҳамда 125 кг вазндаги курашчимиз Ҳасанбой Раҳимов бугун сўнгги имкониятдан фойдаланишга уриниб кўришади.  

Курашчиларимизнинг бахтига уларни мағлуб этган полвонлар финалга чиқиш баробарида Олимпиада лицензиясини ҳам қўлга киритишди ва камига ҳамюртларимизга ҳам имконият тақдим этишди. Фақат бундан фойдаланиш қолди, холос.

39 ёшли Магомед Ибрагимов плей-оффнинг илк учрашувида македониялик Магомедгаджи Нуровга қарши гиламга чиқади. Бу жуфтлик ғолибини молдовалик Раду Леффер кутиб турибди. Леффер билан беллашув ғолиби эса сўнгги, Париж-2024 Олимпиадасига лицензия тақдим этадиган финал учрашувига йўл олади.  

-125 кг вазнда юртимиз шарафини ҳимоя қилаётган Ҳасанбой Раҳимов плей-оффнинг илк босқичида ямайкалик Аарон Жонсон билан тўқнаш келади. Ғолиб чиқса, уни Олимпиада йўлланмаси учун кечадиган яна иккита баҳс кутади. Аввалига венгриялик Даниэл Лигети билан тўқнаш келади. Ютса, кейин финал! Хулласи учта ғалаба керак!    

Демак, иккита учрашувдаги ғалаба Ибрагимовга ҳам, Раҳимовга Париж эшикларини очади. Умиджон Жалоловда эса умуман имконият қолмади. Ҳамюртимизни мағлуб этган ҳиндистонлик Сужит финалга чиқа олмади. Натижада бу вазнда Олимпиадада биздан ҳеч ким бўлмайди. 

Афсуски, Лайлохон Собирова ва Шоҳида Аҳмедова кеча ўтказилган плей-офф босқич учрашувларида рақибаларига имкониятни бой беришди.