Бунақаси бўлмаган! Ўзбекистонлик автопойгачи халқаро мусобақада совриндор бўлди

Яқинда Россия Федерациясининг Санкт-Петербургда шаҳрида бўлиб ўтган халқаро турнирда ўзбекистонлик пойгачи Анвар Эргашев ҳам иштирок этди ва айтиш керак, ҳамюртимиз унда муносиб қатнашди.

15 даража совуқда ўтказилган ва уч кун давом этган пойга якунларига кўра Анвар Эргашев шериги Андрей Рудницкий билан биргаликда «Т3» тоифасида фахрли 3-ўринни эгаллади. Бу ўзбекистонлик спортчининг Халқаро автомобиль федерацияси (FIA) шафелигида ралли-рейд йўналиши бўйича ўтказилган жаҳон кубоги доирасидаги мусобақаларда эришган дастлабки ютуғидир.

2019 йилнинг декабрида мамлакатимиз автомобиль спорти тарихида оламшумул воқеа содир бўлди. Шу йили 6 декабрда Франциянинг Париж шаҳрида бўлиб ўтган Халқаро автомобиль федерацияси Бош ассамблеясида мамлакатимиз “Ўзбекистон миллий автомобиль клуби” нодавлат нотижорат жамоат бирлашмаси тимсолида FIA аъзолигига қабул қилинди. Бу эса халқаро лицензияга эга ўзбекистонлик спортчиларга FIA шафелиги остида ўтадиган расмий мусобақаларда иштирок этиш имконини тақдим этди.

Маълумот учун: Халқаро автомобиль федерациясига дунёдаги 146 мамлакатдан 245та спорт клублари, ассоциация, моторли спорт федерациялари аъзо саналишади. Эндиликда FIA оиласи таркибида 80 миллион киши ўзаро мулоқот қилиш ва фикр алмашиш имкониятига эга бўлди. “Ўзбекистон миллий автомобиль клуби” нодавлат нотижорат жамоат бирлашмасининг бош мақсади – юртимизда автомобиль спортини ички ва халқаро миқёсда ривожлантириш, кенг оммалаштириш ва фаол тарғиб қилиш, шунингдек халқаро йўл ҳаракати хавфсизлигини таъминлашдан иборат.