Бунёд Ҳасанов U17 ёш тоифасида икки карра жаҳон чемпиони! Яна бир курашчимизда бронза + ФОТО

Юнон-рум кураши бўйича кечаётган дунё биринчлигининг иккинчи кунги беллашувлари ҳам Ўзбекистон ўсмирлар терма жамоаси учун муваффақиятли келди. 51 кг вазн тоифасида юртимиз шарафини ҳимоя қилган Бунёд Ҳасанов йўлидан чиққан барча рақибларини яққол устунлик билан мағлубиятга учратиб, икки карра жаҳон чемпиони деган юксак номга сазовор бўлди. 16 ёшли иқтидор эгаси ўтган йили Грецияда ўтган жаҳон чемпионатида ҳам ўзидан катталар билан курашиб, олтин медални қўлга киритганди.

Бу сафар у аввалига россиялик Артём Ткаченкони 10:2, 1/4 финалда украиналик Денис Кирикни 6:2, 1/2 финалда молдовалик Вадим Тарелунгани 10:0, ҳал қилувчи финал беллашувида эса мезбонлар вакили Абдураҳмон Ҳусейнлини 9:0 ҳисобида мағлубиятга учратди. 

Терма жамоамизнинг 60 кг вазн тоифасидаги вакили Садриддин Тўлқинбоев 3-ўрин учун кечган баҳсда руминиялик Александру Илиэ Лунгуни 10:2 ҳисобида енгиб, жаҳон чемпионатининг бронза медалига сазовор бўлди. Бронза медали учун гиламга чиққан қолган икки курашчимиз Афрузбек Ибрагимов (45 кг) россиялик Арслан Алиевга 0:10, Миржалол Шавкатов (92 кг) эса эронлик Амирреза Меҳриталарпоштига 3:4 ҳисобида имкониятни бой бериб қўйди. 

Шу тариқа, юнон-рум кураши бўйича Ўзбекистон терма жамоаси 1 та олтин, 2 та бронза медали билан жаҳон чемпионатидаги иштирокини якунлади. Мусобақанинг биринчи куни Абдулазиз Холмирзаев (80 кг) терма жамоамизга бронза медалини тақдим этган эди.