Бухоро қўл жанги бўйича Жаҳон чемпионатига мезбонлик қиляпти

Мазкур жаҳон биринчилигида сайёрамизнинг 20га яқин давлатидан 400 нафарга яқин қўл жанги усталари иштирок этишмоқда.

Жаҳон чемпионати финал босқичининг очилиш маросимида Ўзбекистон Республикаси Миллий гвардияси қўмондони, генерал-майор Рустам Жўраев, Бухоро вилояти ҳокими Ботир Зарипов ҳамда Ўзбекистон спорт фахрийлари кенгаши раиси Баҳодир Махситов иштирок этди.

Миллий гвардия қўмондони Рустам Жўраев томонидан мазкур нуфузли мусобақанинг мамлакатимизда ташкил этилаётганлиги Ўзбекистонда спортга қаратилаётган юксак эътиборнинг натижаси эканлиги таъкидланади. Шунингдек, қўмондон ўз нутқида жаҳон чемпионатининг финал босқичида иштирок этаётган барча спортчиларга омад тилади.

Мусобақанинг саралаш жанглари Бухоро Олимпия ва паралимпия захиралари коллежи спорт мажмуасида ташкил этилса, ярим финал ва финал жанглари ҳамда тақдирлаш маросими ўз бағрига 2 700 томошабинни сиғдирадиган Бухоро амфитеатрида ўтказилади.

Маълумот учун, жаҳон чемпионатининг барча ғолиб ва совриндорлари эртага аниқланади.