Бухоролик қиличбозлар Олимпиада совриндоридан сабоқ олишди

Семинар доирасида ёш спортчилар учун ҳам бир қатор тадбирлар ўтказилди.

Михаил Тишко шпага йўналиши бўйича мураббий бўлиб, спортчилик даврида Сеул-1988 Олимпия ўйинларининг совриндори, 1987 йил Лозаннада ўтган жаҳон чемпионати ғолиби бўлган. Шубҳасиз, бундай бой тажрибага эга мутахассиснинг билими ёш спортчиларимизнинг келажакда етук спортчи бўлишларида қўл келади. Шу мақсадда тажрибали мураббий иштирокида тренерлар учун семинарлар, ёш қиличбозлар учун эса маҳорат сабоқлари ташкил қилинди.

Тадбирлар Бухоро вилоятидаги 2-БЎСМда ташкил этилиб, унда вилоятнинг 7 нафар мураббийи ва 120 дан зиёд ёш қиличбозлари иштирок этишмоқда. Семинар давомида Михаил Тишко спортчиларни мусобақага психологик тайёрлаш, уларга бериладиган овқатлар рационини тўғри тузиб чиқиш, ёш спортчиларни ҳозирдан маънавий жиҳатдан тарбиялаш, санитария қоидаларини ўргатиш борасида ўз билимлари билан ўртоқлашган бўлса, ёш шпагачилар учун жангдаги тезкор ҳаракатлар, рақибни алдаш, ҳужум қилишдаги тўғри техникалар бўйича сабоқ берди.