Чемпион Немков иштирокидаги жангдан сўнг иккинчи финалчи маълум бўлди

Оқшомнинг марказий жангида ярим оғир вазн тоифасида Bellator чемпиони, россиялик 29 ёшли Вадим Немков литвалик 30 яшар даъвогар Жулиус Энгликасга қарши октагонга кўтарилди. Жулиус жароҳат олган ва "Рамбл" лақаби билан машҳур бўлган 37 ёшли Энтони Жонсоннинг ўрнини эгаллаганди.

Гран-При турнирининг ярим финалидан ўрин олган ва беш раундга мўлжалланган ушбу жанг тўртинчи беш дақиқаликда якунланди. Вадим Немков оғритиш усули билан рақибини мағлуб этди ва камарини ҳимоя қилиш билан бир қаторда Гран-При финалига ҳам йўл олди.  

Эслатиб ўтамиз, ушбу жангдан аввал ўтказилган иккинчи ярим финал тўқнашувида америкалик 32 ёшли Кори Андерсон 51 сонияда 38 ёшли ватандоши, собиқ икки вазн чемпиони Райан Бейдерни нокаутга учратган эди.