Чирчиқ ОПСТТМда спорт мажмуаларининг очилиш маросими ҳамда Наврўз тантаналари ўтказилди + ФОТОРЕПОРТАЖ

Республикада етакчи спорт-таълим масканларидан саналган мазкур марказда 595 нафар ўқувчи 27 спорт тури бўйича таҳсил олмоқда. Ҳозирда марказ спортчи-ўқувчиларининг 230 нафари турли спорт турларидан мамлакат терма жамоалари аъзолари ҳисобланишади.

Уч нафар халқаро тоифадаги спорт устаси, 220 нафар спорт устаси ва номзодлар тайёрлангани марказда спорт ишлари тўғри йўлга қўйилганидан далолат. Янаям эътирофга сазовор томони, 1978 йилдан буён ушбу масканда спорт маҳоратини оширган 64 нафар битурувчи олимпия ўйинларида мамлакатимиз шарафини муносиб ҳимоя қилган. 

Бу каби кўрсаткичларни янада ошириш мақсадида қурилган сузиш ҳавзаси (25/50 метр), бир бирига туташ бокс ва оғир атлетика зали (2 та 18/36 ўлчамда) ҳамда камондан отиш зали (15/30 метр) кенг, ёруғ ва шинам, бир сўз билан айтганда ҳавасингиз ортадиган даражада. Демак, ёшларимиз бу каби яратилган шароитлардан оқилона фойдаланиб, машғулотларга зўр беришади. 

Тадбирда доирасида Наврўз руҳи акс эттирилган бадиий чиқишлар, арқон тортиш, тош кўтариш, кураш, шахмат-шашка, стол тенниси, қиличбозлик сингари ўзига хос беллашувлар ёшларга завқ-шавқ бағишлади.

Шунингдек, сумалак, ҳалим, ош, кўк сомса, кўк чучвара каби миллий таомларнинг тайёрланишида, байрамона безатилган "Наврўз дастурхони" танловларида спортчи-ўқувчиларнинг бевосита иштироки улар қалбида миллий анъаналаримизга бўлган садоқат руҳини ўйғотган бўлса ажаб эмас.

Тадбирда Спорт вазири ўринбосари Шаҳрулло Маҳмудов, "Ўзбекистон қаҳрамони" Тўлқин Ибрагимов, Тошкент вилояти спорт бошқармаси бошлиғи Рустам Бобоқулов, ЎзДЖТСУ ректори Рашид Маткаримов, Ўзбекистон белбоғли кураш федерацияси раиси Равшан Дастиров, Чирчиқ ОПСТТМ директори Равшан Гафуров, Халқ депутатлари Чирчиқ шаҳар кенгаши депутатлари ва бошқа масъуллар иштирок этишди.

Илҳом РАҲМОНОВ тайёрлади