Чирчиқ шаҳар ҳокими “Жисмоний тарбия ва спорт аълочиси” кўкрак нишони билан тақдирланди

Мамлакатимизда соғлом турмуш тарзини шакллантириш, аҳоли, айниқса ёш авлоднинг жисмоний тарбия ва оммавий спорт билан мунтазам шуғулланиши, ҳудудда жисмоний тарбия ва спортни янада ривожлантиришга қўшган муносиб ҳиссаси учун ҳамда Чирчиқ шаҳрида оммавий спорт тарғиботи, унинг жисмоний ва маънавий баркамолликнинг асоси эканини тарғиб қилиш, иқтидорли спортчиларни саралаб олиш борасидаги меҳнати, малакали кадрларни тайёрлашдаги жонбозлиги учун Чирчиқ шаҳар ҳокими Санжар Юсупов “Жисмоний тарбия ва спорт аълочиси“ кўкрак нишони билан тақдирланди.

Мукофотни Ўзбекистон давлат жисмоний тарбия ва спорт университети ректори, иқтисод фанлари доктори, профессор Маҳмуджон Болтабоев топширди.  

Таъкидлаш жоиз, Ўзбекистон Республикаси Вазирлар Маҳкамасининг 2018 йил 3 майдаги 332-сонли қарорига мувофиқ “Жисмоний тарбия ва спорт аълочиси” кўкрак нишони таъсис этилган бўлиб, кўкрак нишони билан Олимпия, Паралимпия ва Осиё ўйинлари ҳамда жаҳон, Осиё чемпионатларида ва бошқа нуфузли халқаро спорт мусобақаларида юксак натижаларга эришган, Ватанимиз байроғини баланд кўтариб келаётган спортчиларнинг тренерлари, жамиятимизда соғлом турмуш тарзини шакллантириш, аҳоли, айниқса ёш авлоднинг жисмоний тарбия ва оммавий спорт билан мунтазам шуғулланиши учун замон талабларига мос шарт-шароитлар яратиш, жисмоний тарбия ва спортни янада ривожлантиришга йўналтирилган кенг кўламли ишлар амалга оширилишига муносиб ҳисса қўшиб келаётган соҳа вакиллари тақдирланишади.

Шунингдек, Ўзбекистон қиличбозлик федерацияси Тошкент вилояти бўлими (раиси Ж. Саъдуллаев) томонидан ҳам Тошкент вилоятида, хусусан, Чирчиқ шаҳрида қиличбозлик спорт турини ривожлантиришга қўшган ҳиссалари учун Чирчиқ шаҳар ҳокимлиги алоҳида ташаккурнома билан тақдирланди. Ушбу ташаккурномани Чирчиқ шаҳар ҳокими С. Юсуповга халқаро тоифадаги (United Word Wrestling) ҳакам Равшан Дастиров топширди.

Илҳом РАҲМОНОВ тайёрлади