"Чучвара отмен". Чимаев танлаган рақибнинг жанги расман эълон қилинди + ПОСТЕР

Бу ҳақда шахсан промоушен раҳбари Дана Уайт хабар берди. UFC Fight Night Vancouver турнирининг марказий жангида икки вазнда собиқ ONE чемпиони, нидерландиялик Ренье де Риддер америкалик Энтони Эрнандесга қарши октагонга чиқади. 

Аввалроқ Риддер ўрта вазннинг янги чемпиони Хамзат Чимаевга қарши жанг ўтказишга тайёр эканини маълум қилганди. Ўз ўрнида Хамзат ҳам бу чорловни қабул қилган эди. 34 ёшли Риддер UFC ўрта вазн (84 кг) тоифаси рейтингида бешинчи, 31 яшар Энтони эса олтинчи ўринни эгаллаб турибди. 

Маълумот учун, де Риддер сўнгги жангини июль ойида Абу-Дабидаги UFC on ABC 9 турнири доирасида собиқ UFC чемпиони австралиялик Роберт Уиттакерга қарши ўтказиб, ҳакамларнинг айри қарори билан ғалаба қозонганди. Ўшанда ҳам Ренье иштирокидаги жанг марказий мақомда эди. Эрнандес эса UFC on ESPN 72 турнирида грузиялик Роман Долидзедан устун келганди.