Дана Уайт UFC ва боксдаги гонорарларни таққослади: "Ҳар ким экканини ўради"

Дунёнинг энг кучли Лигаси раҳбарининг сўзларига кўра, жуда камдан-кам боксчилар катта гонорар олади. UFC’да эса пул бутун ростер бўйлаб тенг тақсимланади. Бундан ташқари, Уайт унинг ташкилотида чемпион бўлмаган, аммо катта тажрибага эга жангчилар кўпинча миллионлаб пул ишлашини таъкидлади.

"Бундай пул топадиган боксчиларнинг жуда оз қисми бор. UFC’га қарайдиган бўлсак, пуллар барча жангчилар ўртасида деярли тенг тақсимланади. Агар сиз Конор Макгрегор ёки Ронда Роузи каби юлдуз бўлсангиз, бу бошқа масала. Кўпчилик пуллик трансляцияларни сота олишини аллақачон исботлаган ва табиийки, уларнинг улуши кўпроқ бўлади. Шундай экан, жангчиларга адолатсиз тўловлар тўғрисидаги барча гап-сўзлар мутлақо ҳақиқатга тўғри келмайди," - деди Уайт Вегас PBS телеканалига берган интервьюсида.

Шунингдек, ташкилот президенти унинг жангчиларига ўз гонорарларини омма олдида муҳокама қилиш ва ошкор қилиш тақиқлангани ҳақидаги маълумотни рад этди.

"Улардан сўранг, бу ҳақда гапириш менинг вазифам эмас. Бунга ҳеч қандай тақиқ йўқ. Уларнинг ҳаммаси хотиржамлик билан қанча маош олишлари ва уларга қанча тўлашгани ҳақида тўлиқ интервью беришлари мумкин. Лекин уларнинг ўзи қанча маош олишларини билишингизни исташмайди. Одамлар қанча пул топганингни билишса, ҳаёт анча мураккаблашади. Миллионлаб пул ишлаб топганингни билгач, садақа сўрайдиган одамлар пайдо бўлади. Сиз ҳар қандай жангчидан интервью олишингиз мумкин - улар сизнинг олдингизда ўзларининг тўлов тизимларини очиқлашади. Аммо ғалати томони шундаки, уларнинг ҳеч бири бундай қилмайди", - дея тушунтирди Уайт.