Даниэль Дюбуа — Энтони Жошуа жанги статистикаси тақдим этилди + ФОТО

Оқшомнинг марказий жанги супероғир вазн тоифасида вақтинчалик IBF чемпионлик камари соҳиби Даниэль Дюбуа ҳамда IBF, WBA, WBO ва IBO йўналишларида собиқ жаҳон чемпиони Энтони Жошуа ўртасида бўлиб ўтди. 

Британиялик боксчилар ўртасидаги 12 раундга мўлжалланган жанг 5-раундда якунланди. Дюбуа номдор рақибини нокаутга учратиб, тўлақонли IBF чемпионига айланди. Ушбу камарни украиналик Александр Усик бир муддат аввал вакант, яъни эгасиз қолдирган эди.  

CompuBox тақдим этган статистикага кўра, Дюбуа барча жабҳаларда ватандошидан устунликка эришган. У уч маротаба Жошуани нокдаун ҳолатига тушириб қўйди. 26 ёшли Даниэль Дюбуа профессионал боксдаги дебютини 2017 йилда ўтказганди. 2022 йилнинг июнь ойида америкалик Тревор Брайанни нокаутга учратиб, WBA Regular камарини қўлга киритган. Шу йил июнда эса у хорватиялик Филип Хрговичга илк мағлубиятни тақдим этиб, вақтинчалик IBF чемпионига айланганди.