Денис Истомин US Open турнирига жўнаб кетди

Мамлакатимизнинг биринчи ракеткаси Палембангдан Жакартага йўл олди ва Индонезия пойтахтидан Туркиянинг Истанбул шаҳрига учади. У ердан эса бевосита Нью-Йорк шаҳрига етиб олади. 

Истомин "Катта Дубулға" туркумига кирувчи US Open турнирига Палембанг - Жакарта - Истанбул - Нью-Йорк авиа рейси бўйича етиб боради. Тасаввур қиляпсиз-а, қанча масофа босиб ўтилишини. Спортчиларга осон эмас. 

Эслатиб ўтамиз, Денис Истомин АҚШ Очиқ чемпионатининг асосий тўр илк даврасида америкалик Стив Жонсонга қарши кортга чиқади. Бу учрашув агар ўзгариш бўлиб қолмаса, душанбадан сешанбага ўтар кечаси ўтказилади. 

Таққослаш учун, Денис Истомин дунё рейтингида 75-ўринни эгаллаб турибди. Жонсон эса 34-поғонадан жой олган. Икки теннисчи шу кунгача ўзаро бир маротаба тўқнаш келишган. 2015 йилнинг 18 сентябрь куни Тошкентда АҚШ терма жамоасига қарши кечган баҳсда Истомин Жонсонни 6:1, 3:6, 7:6(5), 6:7(3), 7:5 ҳисобида мағлуб этган эди.

Камолиддин Алимов (Палембанг, Индонезия)