Дилшодбек Рўзметовнинг навбатдаги рақиби ва жанг санаси маълум бўлди

Бокс бўйича ҳаваскорлар ўртасида жаҳон чемпионати кумуш медали соҳиби, Осиё чемпиони ва бир қанча мусобақалар ғолиби, профессионал боксда яримоғир вазн тоифасида иштирок этиб келаётган Дилшодбек Рўзметовнинг (1-0) навбатдаги рақиби ва жанг санаси маълум бўлди.

Унга кўра, Рўзметов 4 март куни Мексикада ташкил этилаётган бокс оқшоми доирасида мезбон юрт вакили Хесус Паломаресга (7-1-1) қарши рингга кўтарилади. Мусобақа DAZN платформаси орқали трансляция қилинишини қайд этиш лозим.

Айни дамда, Рўзметов бўлажак жангига АҚШда тайёргарлик олиб бормоқда.

Эслатиб ўтамиз, Дилшодбек проф боксдаги сўнгги жангини 2021 йил 17 декабрь куни Тошкентда ташкил этилган бокс оқшоми доирасида россиялик Максим Смирновга (9-15-5) қарши ўтказиб, ғолиб бўлган эди.