Димитров 10 та қўшхатога қарамай Geneva Open финалига чиқди

ATP рейтингида 33-поғонада бораётган Григор Димитров ушбу мусобақанинг илк финалчисига айланди. Болгариялик теннисчи 1/2 финалда дунёнинг 9-ракеткаси, америкалик Тэйлор Фритцни 3/6, 7/5, 7/6(2) ҳисобларида мағлубиятга учратди.

Теннисчиларнинг ўзаро учрашувларидаги ҳисоб мувозанати тикланди - 1:1. Икки соату 55 дақиқа давом этган баҳсда Димитров 8, Фритц 13 та эйс зарбани амалша оширди. Қўшхатолар Григорда 10 та бўлди, Фритц эса тўп узатишда хатога йўл қўймади. Брейклар сони иккала теннисчида ҳам 4 тадан бўлди. 

Эътиборлиси, болгариялик теннисчи 2018 йилдан бери илк бор финалда кортга чиқади. Ўтган вақт оралиғида у 11 та ярим финалларнинг барида мағлубиятга учраган. Айни пайтда Григорда 8 та ATP соврини бор, шу жумладан битта грунт қопламали турнирда.