Доҳада дунёнинг биринчи рақамли теннис маликасини мағлуб этишди

Кутилмаганда дунёнинг биринчи ракеткаси Арина Соболенко WTA рейтингида 26-поғонада бораётган россиялик Екатерина Александровага илк учрашувидаёқ имкониятни бой бериб қўйди - 6/3, 3/6, 6/7(5).

Катя Арина учун ноқулай рақибалардан бири. Теннисчиларнинг ўзаро учрашувларидаги ҳисоб мувозанати тикланди - 4:4. Икки соату 36 дақиқа давом этган баҳсда Александрова 4, Соболенко 6 та эйс зарбасини амалга оширган. Иккала теннис маликаси ҳам 1 тадан қўшхатога йўл қўйиб, 4 та брейк-пойнтдан унумли фойдаланди.

Бу Соболенко учун Australian Open турнирининг финалидан кейинги илк учрашув бўлди. Александрова эса кетма-кет олтинчи учрашувида ғалаба қозонди. Энди у 1/8 финалда Элизе Мертенсга қарши кортга чиқади. Бельгиялик теннисчи иккинчи босқичда испаниялик Кристина Букшадан устун келди - 6/2, 6/3.