Дунёнинг биринчи ракеткаси BNP Paribas Open финалида!

Иккинчи ярим финал учрашувида дунёнинг биринчи ракеткаси Арина Соболенко WTA рейтингида 5-ўринни эгаллаб турган америкалик Мэдисон Кизга биттагина гейм ютиб олиш имконини берди - 6/0, 6/1.

Теннис маликаларининг ўзаро учрашувларида Арина олдинда бормоқда - 5:2. Бор йўғи 52 дақиқа давом этган баҳсда Соболенко эйс зарбасини амалга ошира олмади. Киз эса 2 та эйс зарбасини ижро этган. Брейклар бўйича мутлақ устунлик Арина томонида бўлди - 5 га 0! 

Эътиборлиси, Арина Соболенко Мэдисон Кизнинг 16 та ғалабали сериясига барҳам берди. Беларуслик теннисчи фаолиятида иккинчи бор Индиан-Уэллс турнири финалида ўйнайди. 2023 йилги финалда у қозоғистонлик Елена Рибакинага имкониятни бой бериб қўйганди. Бу сафарги рақиб россиялик 17 ёшли Мирра Андреева бўлади.