Дзамболат Тедеев: "Жаҳон чемпионатининг ўтказилиши - тўғри қарор!

Терма жамоа бош мураббийи Дзамболат Тедеев шу ҳақида интервью берди.

— Жаҳон чемпионатининг шу йилнинг ўзидаёқ ўтказилиши тўғри қарор, — дея сўз бошлади Тедеев. – Спортчилар қайси мусобақага тайёргарлик кўраётганини билиши, ҳамиша спорт формасида бўлиши лозим. Лекин дунёда ҳукм сураётган  ностабил ҳолат бу йил лоақал битта халқаро мусобақа ўтказиладими деган саволни жавобсиз қолдирмоқда. Сир эмас, айрим давлатларда COVID-19 иккинчи тўлқини бошланди. Шунга қарамай, биз декабрь ойида Сербиянинг Белград шаҳрида ўтказилиши режалаштирилаётган жаҳон чемпионатига тайёргарлик кўришда давом этамиз. Курашчиларнинг мусобақаларсиз тайёргарлиги халқаро рестартдан кейинги турнирларда салбий томондан ўз таъсирини ўтказади. Бундан ҳеч ким қочиб қутула олмайди.   

— Терма жамоанинг биринчи йиғини қачон ўтказилади?

— Июль ойининг охирларида спортчилар чуқурлаштирилган тиббий кўрикдан ўтишади. Августнинг бошларида Москва вилоятининг Новогорск шаҳарчаси ёки тоғли Кабардино-Балкариядаги базада йиғиламиз. Айни пайтда марказлашган ўқув-машғулот йиғинини ўтказиш мушкул. Россиялик спортчилар уч ойдан ошиқроқ вақт давомида карантин ҳолатида ўтиришди. Ҳозир мавжуд спорт базалари турли спорт турлари бўйича терма жамоалар билан тўлган.

— Ҳозир сиз мураббийлик қилаётган курашчилар нима билан банд?

— Ҳар куни спортчилар ва уларнинг шахсий мураббийлари билан гаплашяпмиз. Деярли барча курашчилар уй шароитида машғулотларни ўтказишяпти. Бу фақат жисмоний ҳолатни ушлаб туриш учун етади. Бизнинг спортда кучли рақиблар билан ўтказиладиган спарринглар муҳим аҳамиятга эга. Агар спарринг машғулотлар бўлмаса, шуғулланмадим деб ҳисоблайвериш керак. Индивидуал шуғулланиш ҳеч қачон жамоавий тарзда машғулот ўтказишнинг ўрнини боса олмайди.  

— Йил якунига қадар ички мусобақалар ўтказилишини режага киритилганми?

— Белграддаги жаҳон чемпионати олдидан Россия чемпионати ўтказилиши шарт. Айнан шу мусобақа орқали Сербияга ким боришини аниқлаб оламиз. Катта эҳтимол билан Россия чемпионати сентябрь ойида ўтказилади.