Дзюдочиларимиз Bremen Masters турнирида 3 та медаль қўлга киритишди, 1 таси олтин + ФОТО

Деярли 40 йилдан бери ўтказиб келинаётган ушбу нуфузли мусобақада Япония, Бразилия, Грузия, Озарбайжон, Қозоғистон, Финляндия, Германия, Ўзбекистон каби жами 25 давлатдан 600 нафардан зиёд ёш дзюдочилар татамига чиқди. Ўз вақтида мазкур турнирда Хифуме Абэ, Наохиса Такато, Таканори Нагасэ, Аарон Вольф, Лукаш Крпалек, Диёрбек Ўразбоев сингари Олимпиада чемпиони ва совриндорлари ғолиб бўлган.  

Бу йилги мусобақада Искандар Расулов бош мураббийлигидаги Ўзбекистон ёшлар терма жамоасининг 8 нафар дзюдочиси икки кун давомидаги муросасиз беллашувларда юртимиз шарафини ҳимоя қилди. Якунда уларнинг уч нафари шоҳсупага кўтарилди. 

Дарвоқе, дзюдочилик пайтида Бремен турнирида чемпион бўлган Диёрбек Ўразбоевнинг айнан шу мусобақадан мураббийлик фаолияти бошланди. Рио Олимпиадаси совриндорига мураббийлик фаолиятида ҳам омад тилаймиз. 

-81 кг вазнда курашган Мардон Равшанов барча рақибларини мағлубиятга учратиб, мусобақа олтин медалини қўлга киритди. Равшанов 1/2 финалда япониялик Сузукидан, финалда эса бразилиялик Луан Алмейдадан устун келди. Ҳамюртимиз саралаш баҳсларида Бразилия, Финляндия ва икки германиялик рақибларини мағлубиятга учрата олди.  

-90 кг вазн тоифаси финалида татамига чиққан Алишер Саманов озарбайжонлик Аслан Коцоевга имкониятни бой бериб, кумуш медаль билан тақдирланди. -73 кг вазндаги дзюдочимиз Ҳожиакбар Тошев эса бронза медалига сазовор бўлди. 

Мусобақа якунига кўра Ўзбекистон терма жамоаси умумжамоа ҳисобида кучли учликдан жой олди. Катта таркиб билан иштирок этган Озарбайжон терма жамоаси 4 та олтин, 3 та бронза медали билан биринчи ўринни эгаллади. Дзюдо ватани вакиллари - японияликлар 2 та олтин, 1 та кумуш, 2 та бронза медали билан иккинчи ўриндан жой олишди.