Дзюдочиларимиз "Tashkent Grand Slam" турнирининг иккинчи кунида учта медаль қўлга киритишди. Рейтингдаги ўрнимиз қандай?

Кун якунига кўра, вакилларимиз 2 та кумуш ва 1 та бронза медалларига эга бўлишди.

-73 кг вазн тоифасида бронза медаллари учун "ўзбекча дерби" гувоҳига айландик: Шаҳрам Аҳадов Обидхон Нўъмоновдан устун келди ва бронза медалига сазовор бўлди. 

-70 кг вазнли ҳамюртимиз Ширинжон Йўлдошева бронза учун кечган баҳсда Хитой Тайпейи вакиласи Ю Жунг Лиаога имкониятни бой берди ва мусобақани 5-ўринда тугатди. 

-70 кг вазн тоифасида Хуршида Раззоқбердиева финалгача етиб борди ва ҳал қилувчи баҳсда япониялик Рин Маедага имкониятни бой бериб, кумуш медаль соҳибасига айланди.

-81 кг вазнли Мусо Собиров бронза учун баҳсда БАА шарафини ҳимоя қилаётган Гажимурад Омаровга ютқазди - 5-ўрин.

-81 кг вазн тоифасида Арслонбек Тожиев финалга қадар етиб борди ва ҳал қилувчи баҳсда IJF номидан баҳсларда қатнашаётган Тимур Арбузовга мағлуб бўлиб, кумуш медаль билан кифояланди.

Кеча мусобақанинг биринчи кунида полвонларимиз 1 та кумуш ва 4 та бронза медалини қўлга киритгандилар.

Шу тариқа, икки кун якунига кўра, Ўзбекистон терма жамоаси 3 та кумуш ва 5 та бронза медалига эга бўлиб турибдилар. Эртага, 2 март куни мусобақанинг сўнгги кун беллашувлари ўтказилади ва унда оғир вазнли дзюдочилар медаллар учун курашишади. 

Медаллар жамғариш рейтингида дзюдо ватани Япония терма жамоаси пешқадамликни қўлга олган. Ўзбекистон терма жамоаси эса иккинчи ўринга жойлашган. Испания эса учинчи ўринни банд этган.