Екатеринбург “Катта Дубулға”. Мезбонлар биринчи бўлишди!

Соврин жамғармаси 154 000 АҚШ долларини ташкил қилган мусобақада сайёрамизнинг 5та қитъаси 48 давлатидан жами 403 нафар (233 эркак, 170 аёл) дзюдочи иштирок этди. Мамлакатимиз шарафини эса 12 нафар ҳамюртимиз ҳимоя қилди. 

Мусобақа медаллари ҳамда Токио Олимпиадасига муҳим рейтинг очколари ўйналган турнирда Россия терма жамоаси норасмий умумжамоа ҳисобида биринчи ўринни эгаллади. Мезбонлар 3та олтин, 2та кумуш, 4та бронза медалини қўлга киритишди. Улар ҳисобида яна 5та олтинчи, 7та еттинчи ўрин ҳам бор. 

Иккита олтин, битта кумуш, иккита бронза медалига эга чиққан Исроил терма жамоаси иккинчи ўринни банд этди. Иккита олтин ва битта кумуш медалига сазовор бўлган франциялик дзюдочилар эса кучли учликка якун ясашди. 

Япония, Бразилия, Канада, Голландия, Мўғулистон, Аргентина ва Швеция терма жамоалари дзюдочилари Екатеринбург татамиларида битта олтин медални қўлга киритишди. Жами 22та терма жамоага мусобақанинг камида битта бронза медали насиб этди.