Енгил атлетика. Ўзбекистон чемпионати бошланди

Мусобақанинг биринчи кунида бир қатор йўналишлар бўйича ғолиблар аниқланди. Ўзбекистон енгил атлетика федерациясининг Миллий олимпия қўмитаси матбуот хизматига маълум қилишича, совриндорлар рўйхати қуйидагича кўриниш олди.

60 метрга тўсиқлар оша югуриш бўйича эркаклар ўртасида Эргаш Нормуродов 8,39 сония натижа кўрсатиб биринчи бўлди. Иккинчи ўринни Анвар Сафаров (8,55) қўлга киритган бўлса, учинчи ўрин Орзимурод Тугалов (8,64)га насиб қилди.

Аёллар ўртасидаги мусобақаларда эса Наталья Асанова (9,04) рақибларидан тезроқ ҳаракат қилиб, маррага биринчи бўлиб етиб келди. Иккинчи ва учинчи ўринларни мос равишда Александра Юркевсая (9,05) ва Валерия Удалова (9,16) эгаллади.

60 метрга югуриш бўйича ўтган баҳсларда совриндорлар рўйхати қуйидагича кўриниш олди: Жалолиддин Ҳамроқулов (6,98), Олим Ларёв (7,09), Отабек Абдуғаффоров (7,10). Аёллар ўртасида эса Нигина Шарипова (7,73) мамлакат чемпионига айланди. Ундан кейинги ўринларни Сабина Шириева (7,90) ва Диана Аглиулина (8,01) эгаллади.

Аёллар ўртасида узунликка сакраш баҳсларида Роксана Худоярова 5,81 метр натижа кўрсатиб, олтин медаль соҳибига айланди. Иккинчи ва учинчи ўринларни Екатерина Воронина (5,60 м) ва Ольга Цмейрек (5,40м) банд этди.

400 метрга югуриш бўйича Комила Мирсолиевага (59,18) тенг келадиган рақиб топилмади. Кумуш ва бронза медаллари Эльмира Газизова (1:00,46) ҳамда Сабина Умарова (1:00,77)лар эгаллади.

1500 метрга югуриш баҳсларида Мирсаид Бухоров 4:10,87 натижа билан билан олтин медаль соҳибига айланди. Аёллар ўртасида Сабина Талачёва (4:44,79) барча рақибларини ортда қолдира олди.