Эркин курашчиларимиз Осиё чемпионатидан қайтишди

Мусобақанинг охирги икки куни эркин кураш мусобақаси ўтказилиб, унда Олимжон Ҳикматов ва Абдурауф Бозорбоев мураббийлигидаги эркин курашчиларимиз 1 та олтин, 1 та кумуш, 2 та бронза медали билан умумжамоа ҳисобида Эрон, Ҳиндистон ва Қозоғистон терма жамоаларидан сўнг тўртинчи ўринни эгаллаганди.

Ҳозиргина эркин кураш бўйича Ўзбекистон терма жамоаси делегацияси Олмаота шаҳридан юртимизга қайтиб келди. Ислом Каримов номидаги Тошкент халқаро аэропортида курашчиларимизни Ўзбекистон спорт курашлари ассоциацияси мутасаддилари кутиб олишди.     

Таъкидлаш жоиз, Осиё чемпионатида терма жамоамизнинг асосан иккинчи таркиби иштирок этди. Жамоамизга Осиё чемпионатидаги ягона олтин медални 61 кг вазн тоифасидаги эркин курашчимиз Жаҳонгирмирзо Туробов тақдим этди. Сирожиддин Ҳасанов (70 кг) кумуш медални қўлга киритган бўлса, Рио Олимпиадасининг бронза медали совриндори Ихтиёр Наврўзов (74 кг) ва Нодиржон Сафаров (57 кг) Осиё чемпионатининг бронза медалига эга чиқишди.