Эркин курашчимиз Шерзод Поёнов жаҳон чемпионати финалида, Рустамбеков бронза учун курашади

Дунё биринчилигининг эркин кураш бўйича иккинчи кунги баҳсларида терма жамоамизнинг икки нафар вакили медаллар йўлида курашга киришди. Икки карра Осиё чемпиони Шерзод Поёнов учун кун омадли якунланди. 92 кг вазн тоифасида юртимиз шарафини ҳимоя қилаётган курашчимиз финал йўлланмасини қўлга киритди. 

Поёнов илк даврада грециялик Григориос Саридисни 12-1, 1/8 финалда япониялик Сорато Каназавани 16-6, 1/4 финалда канадалик Сингҳ Гревални 10-3, 1/2 финалда эса россиялик Гаджимурад Гаджибатировни 4-1 (туше) ҳисобида мағлубиятга учратди. Бугун у жаҳон чемпионлиги учун қозоғистонлик Камил Куруглиевга қарши гиламга чиқади. Бу икки қардош курашчи ўтган йилги Осиё чемпионати финалида ўзаро тўқнаш келишган ва ўшанда Поёнов рақибини 4-2 ҳиобида доғда қолдирганди. Медаллар учун финал блок беллашувлари бизнинг вақт билан соат 20:00да бошланади.  

-65 кг вазн тоифасидаги курашчимиз Санжарбек Рустамбековда ҳам жаҳон чемпионатининг бронза медалини қўлга киритиш имконияти бор. У ўтиш босқичида арманистонлик Арман Мусикянга қарши баҳс олиб боради. Рустамбеков кеча 1/4 финалда Рейжи Учидага ютқазиб қўйганди. Япониялик курашчи финалга йўл олгани боис, Санжарбекда бронза учун имконият юзага келди.