Фарғонада бел олиш ва уч кураш бўйича Ўзбекистон чемпионати ўтказилмоқда

Ўзбекистон Республикаси Жисмоний тарбия ва спорт вазирлиги ҳамда Ўзбекистон Бел олиш ва уч кураш ассоциациясининг йиллик тақвим-режасидан жой олган мазкур мамлакат чемпионатида иштирок этиш учун Қорақалпоғистон Республикаси, Тошкент шаҳри ва барча вилоятлардан 400 нафардан ортиқ ёш полвонлар иштирок этмоқда.

Бугун шунингдек, мусобақанинг тантанали очилиш маросими ҳам ташкил этилди. Маросимда сўз олган Фарғона тумани ҳокими ўринбосари Илҳом Тошпўлатов, Бел олиш ва уч кураш ассоциацияси бош котиби Носир Азизовлар барча спортчиларга мусобақада кучли учликка кириши учун омад тилашди.

Тадбир доирасида Фарғона туман ҳокимлигига Бел олиш ва уч кураш ассоциацияси томонидан ташаккурнома ва эсдалик совғалари топширилган бўлса, Бел олиш ва уч кураш бўйича Фарғона вилоят ҳудудий ассоциацияси томонидан 2-3 апрель кунлари ўқув-семинарда иштирок этган ҳакамлар ва мураббийлар учун эсдалик совғалари улашилди.    

Регламентга мувофиқ, Бел олиш ва уч курашнинг яктакли йўналиши бўйича беллашувлар 6 апрелга қадар давом этади. 7 апрелдан эса уч кураш бўйича мусобақага старт берилади.