Федерация раҳбари Осиё чемпионати олдидан дзюдочилар билан учрашди

Учинчи кундирки, терма жамоамиз аъзолари Бангкокда қитъа биринчилигига тайёргарликни давом эттиришяпти. Ўзбекистон дзюдо федерацияси раиси Азизжон Камилов нуфузли мусобақа олдида турган мураббий ва дзюдочиларимиз билан учрашди. 

Дўстона ва жуда илиқ тарзда ўтган учрашувда федерация раҳбари спортчиларимизга ғалаба ёр бўлишини тилаган ҳолда, халқимиз улардан янги марраларни забт этишини кутаётганини айтди. 

"Ишончим комил, сизлар биз ва халқимиз кутаётган натижага эриша оласизлар. Сизларда чемпионлик характери ва руҳияти бор", - деди А.Камилов.

Ўзбекистон дзюдо федерацияси психологи Лола Агзамова терма жамоамиз таркибида ёш дзюдочилар кўп бўлишига қарамай, улар Осиё чемпионатига тайёр эканини урғулади. 

Ўз ўрнида спортчи ва мураббийларимиз ҳам билдирилаётган ишончни оқлаш учун астойдил ҳаракат қилишларини маълум қилишди.