Финалга етиб келган Истомин қанча гонорар ва очкога эга бўлди?

Мусобақанинг соврин жамғармаси 561 345 еврони ташкил этади. Бугун финал учрашуви ўтказилиб, турнир ғолиби ва вице-чемпиони номи маълум бўлади. Ҳал қилувчи финал баҳси ҳамюртимиз Денис Истомин иштирокида кечади. 

Кеча Денис ярим финалда чилилик Николас Харрини 7:5, 6:7(4), 6:4 ҳисобида мағлуб этиб, финал чиптасини қўлга киритган эди. Унинг бугунги финалдаги рақиби словакиялик Мартин Клижан эса испаниялик Хауме Муньярдан 1 соату 42 дақиқа давом этган учрашувда 7:6(3), 6:3 ҳисобида устун келганди. 

Маълумот учун, финалга етиб келган Истомин 47 105 евро мукофот пули ҳамда 150 рейтинг очкосини қўлга киритди. Шунингдек, турнирнинг саралаш мусобақасида икки рақибини мағлуб этгани учун яна қўшимча 6 очкога эга бўлади. 

Таққослаш учун, Денис Истомин жаҳон рейтингида 95, Николас 53, Муньяр 88, Клижан эса 112-ўринни эгаллаб турибди. Агар бугун Истомин ғалаба қозонса, фаолиятидаги учинчи ATP титулини қўлга киритади. Истомин ва Клижан шу кунгача ўзаро уч маротаба тўқнаш келишган. Икки ўйинда Денис, яна бир баҳсда Мартин зафар қучган.