Фомин 200 000 долларлик турнирда 4-ракеткани мағлуб этди

Мукофот жамғармаси 200 000 АҚШ долларини ташкил этувчи ушбу турнирнинг саралаш баҳсларида ҳамюртимиз Сергей Фомин ҳам ўз омадини синаб кўрмоқда. Мамлакатимизнинг иккинчи ракеткаси илк даврада саралашда тўртинчи рақам остида таснифланган япониялик Рио Ногучини 6/7(4), 6/4, 7/6(2) ҳисобида мағлуб этишни уддалади. 

Таққослаш учун, Ногучи ATP рейтингида 219, Фомин 492-ўринни эгаллаб турибди. Уч соату тўрт дақиқа давом этган баҳсда Рио 3, Сергей 11 та эйс зарбасини амалга оширган. Қўшхатолар ҳамюртимизда кўпроқ бўлди - 4 га 1. Эртага Фомин саралашнинг финал учрашувида 10-рақам остида сараланган қозоғистонлик Денис Евсеевга қарши кортга чиқади.